"ތުރާފިލުވުގެ މައްސަލަތަކަށް ހައްލު ލިބޭނީ ކޯޓުން": އާއިދާގެ ތުޙުމަތާއެކު މުސްތޮގެ އެތައް ސުވާލެއް!

އަދަދު ނޫހުގެ ނޫސްވެރިޔާ އާއިދާ ޢަބްދުލް ޙަކީމް ދާދި ފަހުން ސޯޝަލް މީޑިޔާގައި އާއްމު ކުރި ވީޑިއޯއަކަށް ގިނަ ބައެއްގެ ސަމާލުކަން ހުއްޓުނެވެ. އެ ވީޑިއޯގައި އާއިދާ ހާމަކޮށްފައިވާ މަޢުލޫމާތު ތަކަށް ބަލާއިރު، އެއީ ދޭދޭ ދެ ގެއެއްގެ މެދުގައި އޮތް ތުރާފިލުވުމުގެ މައްސަަލައެވެ. ޒަމާންވީ މައްސަލައެއްކަމަށް ބުނެ، އެ މައްސަލައަށް ހައްލު ލިބިފައިނުވަނީ ނުފޫޒު ގަދަ ބައެއްގެ ނުފޫޒުންކަމަށް ބުނެ، އާއިދާގެ ތުޙުމަތު އަމާޒުކޮށްފައިވަނީ ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެންބަރު މުޙައްމަދު މުޞްތަފާ އިބްރާޙިމް (އިމްނާ މުސްތޮ) އަށެވެ.

ގިނަ ބަޔަކަށް ކަމުގެ ހަޤީޤަތް އޮޅޭގޮތަށް، އަދި މުސްތޮއާ ސީދާގޮތުން ގުޅުމެއް ނެތް މައްސަލައެއްގައި އެެފަދަ ބޮޑު ތުޙުމަތެއް ކުރިމަތިކޮށްފައިވާތީ، އެކަން ދިވެހި ރައްޔިތުންނަށް ސާފުކޮށްދިނުމަކީ މުސްތޮގެ ޒިންމާއެއް ކަމަށް ދެކި، މުސްތޮ ވަނީ އެތައް ސުވާލުތަކެއް އާއިދާއާ ކުރިމަތިކޮށްފައެވެ.

" އެއީ އަޅުގަނޑާ ގުޅުންހުރި މައްސަލައެއް ނޫން. އަދި އެއީ އަޅުގަނޑުގެ އަންހެނުންގެ ގެއެއްވެސް ނޫން. ނަމަވެސް އެގޭގެ ކުއްޖަކާ ކައިވެނިކޮށްގެން އުޅޭތީ އެމައްސަލައަށް ހައްލެއް ހޯދުމަށް އަޅުގަނޑާ ވާހަކަދެއްކެވީ ސިޓީކައުންސިލްގެ އެއިރުގެ މެންބަރެއް. އަޅުގަނޑު މެދުވެރިވެގެން ދެ ގޭގެ ވެރިފަރާތް ވާހަކަދައްކާ ހައްލުކުރާނެ ގޮތަކަށް އެއްބަސްވެވުނު ނަމަވެސް އެއާ ޚިލާފަށް މަސައްކަތް ކުރުމުން އެކަން ހައްލުނުވެ އޮތީ. ހަމަ އެހެންމެ މަސައްކަތް ހުއްޓުވި ކަމަށް އެބުނަނީ ގަވާއިދާ ހިލާފަށް ހުއްދަނެތި ގޭގެ ވެރިފަރާތަށް ވެސް ނޭނގި ގޭގެ ޝީޓުމައްޗަށް އަރާ ޝީޓުމަތީ ފުށްކަށިބަހައްޓައިގެން މަރުތޭލުން ތަޅާ ގެދޮރަށް އަނިޔާ ލިބޭތީ އެކަން ހުއްޓުވި ހުއްޓުވުން. ވީމާ އަޅުގަނޑުވާނީ އެ މައްސަލަ ހައްލުކުރަން އެހީތެރިވި ފަރާތަކަށް ނޫންތޯ؟ އެކަން ރަނގަޅުކުރުމަށް ފުރުޞަތު ފަހިކޮށް ނުދެވޭތޯ؟ ކީއްވެތޯ އެކަން އެއްބަސްވިގޮތަށް ހައްލު ނުކުރެއްވީ؟ ކީއްވެގެންތޯ އަނެކުންގެ ގެދޮރުގެ ހުރުމަތްކަނޑާ ގަވާއިދާ ހިލާފަށް މަސައްކަތް ކުރަންވީ؟ ދިގު ހަރުގަނޑެއް ހިފައިގެން ބަންގާޅީން ގޮވައިގެން ގޮސް، ހ.މިޝްކާތުގެއަށް ވައްދަން މަސައްކަތް ނުކުރަންތޯ؟ އާއިދާގެ އާއިލާއާ ގުޅުން ހުރި މީހެއް ބަންގާޅީންނާއެކު ގޮސް ޤާނޫނާ ޤަވާއިދާ ޚިލާފަށް މިކަންކަން ނުކުރަންތޯ، ކޮންސްޓްރަކްޝަން ކުންފުނިތަކާ ގުޅުން އޮތް ނަމަ ވެސް އަދި ކޮންމެ މީހަކަށް ވި ނަމަވެސް ހުއްދަ ނެތި އެހެން މީހެއްގެ ގޯތި ގެދޮރަށް ވަނުމުގެ ހުއްދައެއް ނޯންނާނެ ނޫންތޯ؟ - މިއީ މުސްތޮ ކުރިމަތިކޮށްފައިވާ ބައެއް ސުވާލުތަކެވެ.

މި ކަންކަމަށް ނަޒަރު ކުރާއިރު، ދެ ގެއެއްގެ ދެމެދުގައި ކޮންމެވެސް މިންވަރެއްގެ މައްސަލަތަކެއް ޖެހިގެން އުޅޭކަމަށް ޤަބޫލުކުރެވެއެވެ. އަދި ހ.މިޝްކާތަށް ލިބިފައިވާ ގެއްލުންތަކާއެކު އެގޭގައި ނޫޅެވިގެން ގޭ ހުރިހާ އެންމެންވަނީ އަމިއްލަ އުފަން ގެދޮރު ދޫކޮށް އެހެންތަންނަށް ބަދަލުވެފައެވެ. އެއްބައެއްގެ ސަބަބުން އަނެއް ބަޔަކަށް އެއްވެސް އުނދަގުލެއް ނުވަތަ ތުރާލެއް ފޯރާނަމަ، އެކަމަށް އޮތް ހައްލަކީ ޝަރުޢީ މަރުޙަލާގެ ތެރެއިން އެކަމަށް ހައްލު ހޯދުމެވެ. އެއީ އެކަމުގެ ހަޤީޤަތެއް ނެތް ވާހަކަ މީސްމީޑިޔާގައި ދައްކާ، ކުށެއްނެތް އެތައް ބަޔަކު ބަދުނާމު ކޮށްގެން ދޮގު ވާހަކަ ފަތުރައިގެން ހޯދޭނެ ހައްލެއްް ނޫނެވެ. މިހާ ދުވަސްވީ މައްސަލައެއްކަމަށް ބުނާއިރު، މިކަމުގެ ޝަކުވާ ޝަރުޢީ ކޯޓެއްގައި އުފުލާފައި ނެތުމުން، މި މައްސަލަ ހައްލު ކުރުމުގެ ސާފު ނިޔަތް އޮތްކަމާމެދުވެސް ސުވާލު އުފެދެއެވެ.

ރައްޔިތުންގެ މަޖިލީހުގެ މެންބަރެއްގެ ހައިޞިއްޔަތުން މުސްތޮ އެދެނީ މި މައްސަލައަށް އަވަސް ހައްލެއް ހޯދުމަށް ޝަރުޢީ ކޯޓު މެދުވެރިކޮށް މަސައްކަތް ކުރުމެވެ.

މިއީ އެއްގޮތަކަށްވެސް އަޅުގަނޑާ ބެހޭ މައްސަލައެއްވެސް ނޫން. ނަމަވެސް އަޅުގަނޑަށްވެސް ދޮގު ތުޙުމަތުތަކެއް ކޮށްފައިވާތީ އެކަން ސާފުކޮށްދިނުން އަޅުގަނޑުގެ ބޭނުމަކަށްވީ. އަޅުގަނޑުވެސް އެދެނީ މި މައްސަލައަށް ވީ އެންމެ އަވަހަކަށް ހައްލު ލިބިގެން ދިއުން. އަދި އެއްވެސް މީހެއްގެ އަބުރަށް ހުތުރުވާފަދަ އެއްވެސް ދޮގު ވާހަކައެއް ނުފެތުރުން – މުސްތޮ ވިދާޅުވިއެވެ.