އާބަން ޑިވެލޮޕްމަންޓްގެ ބިލާ ގުޅިގެން އިއްބެގެ ހިފެހެއްޓުމެއް ނެތް ޝުކުރު ރައީސް ޑރ މުޢިއްޒަށް!

އާބަން ޑިވެލޮޕްމަންޓާއި ގުޅޭ ބިލެއް ރައްޔިތުންގެ މަޖިލީހަށް ހުށަހެއްވި ކަމީ މި ސަރުކާރުން ދިވެހި ރައްޔިތުން ދެކެވާ ލޯބި ރަމްޒުކޮށްދޭ ކަމެއް ކަމަށާއި، އެހެންކަމުން ހުރިހާ ޝުކުރެއް ހައްޤުވަނީ އަދުގެ ރައީސް ޑރ މުޙައްމަދު މުޢިއްޒަަށް ކަމަށް ފުވައްމުލަކު ދެކުނު ދާއިރާގެ މެމްބަރު އިބްރާޙިމް ޙުސައިން ވިދާޅުވެއްޖެއެވެ.

އިއްބެ މިފަދައިން ވިދާޅުވީ އާބަން ޑިވެލޮޕްމަންޓާ ބެހޭ ބިލާ ގުޅޭ ގޮތުން މިއަދުގެ މަޖިލީހުގައި ވާހަކަފުޅު ދައްކަވަމުންނެވެ.

މިފަދަ ބިލެއް ހުށަހަޅަން މި ޖެހުނީ އާބަން ޑިވެލޮޕްމަަންޓާ ގުޅޭ ސާފު ޤާނޫނެއްވެސް އަދި ޤަވާއިދެއްވެސް މިއަދާ ހަމައަށް އައިއިރުވެސް ހުށަހެޅިފައިނުވާތީ. ކުރިއަރަމުން އަންނަ ކޮންމެ އާރބަން ސަރަހައްދަކަށްވެސް އެކަށީގެންވާ ވަޞީލަތްތައް ވަރަށް މުޙިއްމު. މަގުތަކާއި، ދަތުރުފަތުރުގެ ޚިދުމަތްތަކާއި ފެނާއި ކަރަންޓާއި ނަރުދަމާގެ ޚިދުމަތްތައް އެންމެ އެދެވޭ ގޮތެއްގައި އެ ސަރަހައްދުތަކުން ލިއްބައިދޭން ޖެހޭ. އަދި ޑިޖިޓަލް އިންފްރާސްޓްރަކްޗާރ އަށް އިސްކަން ދިނުމަކީ ރާއްޖޭގެ އާބާދީއަށް ނުހަނު ފައިދާ ބޮޑުކަމެއްކަމަށް އަޅުގަނޑު ޤަބޫލު ކުރަން – އިއްބެ ވިދާޅުވިއެވެ.

މީގެ އިތުރުން، އިއްބެ ވިދާޅުވީ ރާއްޖޭގެ ރައްޔިތުންގެ ބޯހިޔާވަހިކަމަށް ހައްލު ގެނެސްދެއްވާނީ މި ސަރުކާރުން ކަމަށެވެ.  

މިފަދަ ބިލެއްގެ އެންމެ މުހިންމު ކަމަކީ ރާއްޖޭގެ އިޤްތިސާދަށް އަދި ބަޖެޓަށް ޚަރަދު ކުޑަވާނެ ގޮތަކަށް ރައްޔިތުންނަށް އުފާވެރިކަން ގެނެސްދޭނެ ގޮތެއް ހޯދައިދިނުން ކަމަށްވެސް މެމްބަރުން ވަނީ ފާހަގަ ކުރައްވާފައެވެ.