އާބަން ޑިވެލޮޕްމަންޓުގެ ބިލުގެ އެންމެ ބޮޑު އުފަލެއް ލިބޭނީ މާލޭ ރައްޔިތުންނަށް - މުސްތޮ

ރާއްޖޭގައި އާބަން ޑިވެލޮޕްމަންޓު ސެންޓަރުތަކާއި ޒޯންތަކެއް ކަނޑައެޅުމަކީ މިވަގުތަށް ވަރަށް މުހިންމު ކަމެއް ކަމަށްކަމާއި، ބޭނުންހާ ތަނަކުން އެކި މީސްމީހުންނަށް ގޯތި ބަހަމުން އައި ސަޤާފަތް މި ޤާނޫނުގެ ސަބަބުން ބަދަލުވެގެންދާނެ ކަމަށް މާފަންނު ހުޅަނގު ދާއިރާގެ މެމްބަރު މުޙައްމަދު މުޞްތަފާ އިބްރާޙިމް (އިމްނާ މުސްތޮ) ވިދާޅުވެއްޖެއެވެ.

އާބަން ޑިވެލޮޕްމަންޓުގެ ބިލަށް ބަހުސް ކުރައްވަމުން މުސްތޮ ވިދާޅުވީ، މާލޭގެ ރައްޔިތުން ދިރިއުޅެމުން ދަނީ ވަރަށް ހިތްދަތިކޮށް ކަމަށާއި، ވައިނުސާފު މާޙައުލެއްގައި އުޅެން ޖެހުމުގެ ސަބަބުން ރައްޔިތުންގެ ނޭވާލާ ނިޒާމަށްވެސް އެތައް ބަލިތަކެއް ޖެހެމުންދާ ކަމަށެވެ.

ޒަމާނުންސުރެ އަޅުގަނޑުމެން ދައްކަމުން އަންނަ ވާހަކައެއް މީ. ދިވެހިރާއްޖެ އޮންނަން ޖެހޭނީ ކަނޑައެޅިގެން ވަކި ސަރަހައްދުތަކެއް ތަރައްޤީ ކުރެވޭ ގޮތަށޭ. އެކި ސަރުކާރު ތަކުގައިވެސް މި ވާހަކަ ދައްކަމުން ދިޔަ، ނަމަވެސް ހިތާމައަކީ މިއަދާ ހަމައަށް ދިޔަ އިރުވެސް މިފަދަ ޤާނޫނެއް އަދި ޤަވާއިދެއްވެސް އެކަށަހެޅިފައި ނެތްކަން. އޭގެ ނަތީޖާ އަކީ މާލޭގެ ރައްޔިތުންނަށް ހިތްދަތިކަން ލިބުން. - މުސްތޮ ވިދާޅުވިއެވެ.

މި ޤާނޫނުގެ ދަށުން ރާއްޖެ ތަރައްޤީވެގެން ދާއިރު، ވަރަށް މުޙިއްމު ކަންކަން ފާހަގަ ކުރެވިފައިވާ ކަމަށާއި، އެގޮތުން ދަތުރުފަތުރުގެ ކަންކަމާއި މި ނޫންވެސް ޒަރޫރީ ކަންކަން ރޭވިފައިވާ ގޮތް ސާފުކޮށް ފެންނަން އޮންނާނެ ކަމަށްވެސް މުސްތޮ ފާހަގަ ކުރެއްވިއެވެ.

މިފަދަ ބިލެއްގެ އެންމެ މުހިންމު ކަމަކީ ރާއްޖޭގެ އިޤްތިސާދަށް އަދި ބަޖެޓަށް ޚަރަދު ކުޑަވާނެ ގޮތަކަށް ރައްޔިތުންނަށް އުފާވެރިކަން ގެނެސްދޭނެ ގޮތެއް ހޯދައިދިނުން ކަމަށް ވަނީ ވިދާޅުވެފައެވެ.

ތަރައްޤީގެ ޕްލޭނެއް ނެތި ހުޅުމާލެ ފޭސް 2 ތަރައްޤީ ވެގެންގޮސްފި ނަމަ ވެގެންދާނީ މިހާރު މާލޭގެ ރައްޔިތުންގެ އުޅެންޖެހިފައިވާ ގޮތަށް އުޅެން ކަމަށާއި، ނަތީޖާއަކަށްވާނީ ކާރޫބާރޫ ބޮޑުވެ އެތައް ބަލިތަކަކަށް މަގު ފަހިވުން ކަމަށްވެސް މުސްތޮ ވިދާޅުވިއެވެ.