ބައެއް ހާއްސަ ހާލަތްތަކުގައި ޕެންޝަން ފަންޑުން އިތުރު ކަންކަމަށް ފައިސާ ބޭނުން ކުރެވޭ ގޮތަށް، ޕެންޝަނާ ބެހޭ ގާނޫނަށް އިސްލާހު ގެނައުމަށް، ހުށަހަޅުއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެ މަނިކުފާނު މި ގޮތަށް ވިދާޅުވީ ހެންވޭރު ރައްޔިތުންނާ ބައްދަލު ކުރެއްވުމަށް ކަލާފާނު އިސްކޫލުގައި ރޭ ބޭއްވި މަޝްވަރާ ބައްދަލުކުރެއްވުމުގައި ޕެންޝަން ފަންޑު ބޭނުން ކުރެވޭ މިންވަރު އިތުރު ކުރެވޭނެ ގޮތެއް އޮތްތޯ މީހަކު ކުރި ސުވާލަކަށް ޖަވާބުދެއްވަމުންނެވެ.
ރައީސް ވިދާޅުވީ ބައެއް ހާއްސަ ހާލަތްތަކުގައި އެ ފަންޑުން އިތުރު ކަންކަމަށް ފައިސާ ބޭނުން ކުރެވޭ ގޮތަށް، ޕެންޝަނާ ބެހޭ ގާނޫނަށް އިސްލާހު ގެންނެވުމަށް، ރައްޔިތުންގެ މަޖިލީހުގެ ކުރިއަށް އޮތް ދައުރަށް ހުށަހެޅުއްވުމަށް ނިންމަވާފައިވާ ކަމަށެވެ.
މީގެ އިތުރުން ރައްޔިތުން އެކި ދާއިރާތަކުން ފާޅުކޮށްފައިވާ ކަންބޮޑުވުންތައް އަޑުއައްސަވައި، އޮންނަ އުސޫލުތަކުގެ ތެރެއިން، ވީހާ ވެސް އީޖާބީ ގޮތެއްގައި އެ ކަންކަމަށް ހައްލު ހޯދައިދިނުމަށް މަސައްކަތް ކުރައްވާނޭކަމުގެ ޔަގީންކަން ވެސް ރައީސް ޑރ. މުއިއްޒު ރޭ ވަނީ ދެއްވާފަ އެވެ.
ކޮމެންޓް