ދިވެހި ދަރިވަރުންނަށް ރަނގަޅު ތަރުބިއްޔަތެއް ދެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ކުރައްވާ މަސައްކަތް ބެލެނިވެރިން ބަލައިގަންނަނީ އުފަލާ އެކު ކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ޕީއެންސީ މެމްބަރު މުހައްމަދު ސިނާން ވިދާޅުވެއްޖެ އެވެ.
ސިނާން، މިއަދު ކުރެއްވި އެކްސް ޕޯސްޓެއްގައި ވިދާޅުވީ ކުދިން ތަރުބިއްޔަތު ކުރުމުގައި އިސްކޫލު ދައުރުގައި ރަނގަޅު އާދަކާދަ ތަކާއި ރިވެތި އަހުލާގީ މިންގަޑުތައް ދަރިވަރުންނަށް އަށަގެންނެވުމަކީ ކޮންމެހެން މުހިއްމު ކަމެއް ކަމީ ދިވެހި ކޮންމެ ދަރިވަރެއްގެ ބެލެނިވެރިން ވެސް އިއްތިފާގު ވާ ހަގީގަތެއް ކަމަށެވެ. އެ ގޮތުން މި ފަހުން އިސްކޫލު ކުދިންގެ ޔުނިފޯމަށް ގެނައި ބަދަލަކީ ހެޔޮ ބަދަލެއް ގޮތުގައި ހުރިހާ ބެލެނިވެރިންވެސް ބަލައިގަންނަ ކަމަށް ސިނާން ވިދާޅުވި އެވެ.
"މި ކަމާ މޭ ކަރައިގެން މި އުޅެނީ ސްކޫލަށް ދާ ވަރައްވުރެ ބޮޑެތި ކުދިން ތިބި އިދިކޮޅު ސިޔާސީ، ހޭބުއްދި ނުޖެހޭ މަދު ބައެއް. ދިވެހި ދަރިވަރުންނަށް ރަނގަޅު ތަރުބިއްޔަތެއް ދެއްވުމަށް ރައީސް ތި ކުރައްވާ މަސައްކަތްޕުޅުތައް ބެލެނިވެރިން އުފަލާއެކު ބަލައިގަނޭ،" ސިނާންގެ ޕޯސްޓުގައިވެ އެވެ.
ސަރުކާރު އިސްކޫލުތަކުގެ ރަސްމީ ޔުނިފޯމް އަދި އެކްޓިވިޓީ ޔުނިފޯމަށް 2027 އިން ފެށިގެން ބަދަލު ގެންނަން އެޑިއުކޭޝަން މިނިސްޓްރީން ވަނީ ނިންމާފަ އެވެ. މި ގެންނަ ބައެއް ބަދަލުތަކުގެ ތެރޭގައި ކީ ސްޓޭޖު-2 ނޫނީ ގްރޭޑް ހަތަރަކުން މަތީގެ ދަރިވަރުންނަށް ޔުނިފޯމާ އެކު ތިރިން ހަރުވާޅު ލާން ޖެހޭނެ އެވެ. މީގެ އިތުރުން ގްރޭޑް ނުވައަކުން ފެށިގެން މަތީގެ ދަރިވަރުންނަށް ތުނބުޅި ބެހެއްޓޭނެ ކަމަށް އައު އުސޫލުގައިވެ އެވެ.
ކޮމެންޓް