ގދ. ތިނަދޫއަށް ބޯކޮށް ވާރޭ ވެހި ގެތަކަށް ގެއްލުން ވެއްޖެ އެވެ.
އެމްއެންޑީއެފުން ބުނީ ބޯކޮށް ވާރޭވެހި ތިނަދޫ ސިޓީގެ މަގުތަކުގައި ފެންބޮޑުވަމުން ދާތީ، ފެން ހިންދުމުގެ މަސައްކަތުގައި އެމްއެންޑީއެފް ސަދަން އޭރިއާ ކޮމާންޑް، ތިނަދޫ ފަޔާ ސްޓޭޝަންގެ ފަޔާފައިޓަރުން ހަރަކާތްތެރިވަމުން އަންނަ ކަމަށެވެ.
ތިނަދޫ އަށް ރޭ ދަންވަރުން ފެށިގެން މިއަދު ހެނދުނާ ހަމައަށް ވެހުނު ވާރޭގައި ބައެއް ގެތަކަށް ފެން ވަދެ އެކި ވަރުގެ ގެއްލުންތައް ލިބިފައިވެ އެވެ. އަދި ބައެއް ގޭގޭގެ ކޮޓަރީގައި ހުރި އެނދާއި ގޮދަޑީގެ އިތުރުން ބައެއް ތަކެއްޗަށް ވެސް ވަނީ ގެއްލުންވެފަ އެވެ.
ސޯޝަލް މީޑިއާގައި ދައުރުވަމުން އަންނަ ފޮޓޯތަކުން ފެންނަ ގޮތުގައި މި ވިއްސާރާގައި ތިނަދޫ އަބްދުއްސަމަދު މެމޯރިއަލް ހޮސްޕިޓަލަށް ވެސް ފެން ވަދެފައިވެ އެވެ.
ތިނަދޫއަށް ވިއްސާރާގައި ލިބުނު ގެއްލުމުގެ ތަފުސީލު އަދި ސާފުވާ ގޮތެއް ނުވެ އެވެ.
މޫސުމާބެހޭ ގައުމީ އިދާރާ އިން ބުނީ މިއަދު 17:00 އާ ހަމައަށް އުތުރާއި ދެކުނުގެ އެކި ހިސާބަށް ވިއްސާރަ ކުރާނެ ކަމަށާއި ބައެއް ރަށްރަށަށް ގުގުރުމާއެކު ބޯކޮށް ވާރޭ ވެހުން އެކަށީގެންވާ ކަމަށެވެ. އަދި މެދު ރާއްޖެތެރޭގެ ބައެއް ރަށްރަށަށް ވެސް ކެރީގެ އަސަރު ކުރާނެ ކަމަށް މެޓުން ލަފާ ކުރެ އެވެ.
ކޮމެންޓް