ރައީސް، ރައްޔިތުންނާ ބައްދަލުކުރައްވަނީ ހެޔޮނިޔަތުގައި: ޝަކީލް

ރައީސް ޑރ. މުހައްމަދު މުއިއްޒު ދިވެހި ރައްޔިތުންނާ ބައްދަލުކުރައްވަމުން ގެންދަވަނީ ހެޔޮނިތުގައި ކަމަށް މޯލްޑިވްސް ހައްޖު ކޯޕަރޭޝަން ލިމިޓެޑްގެ މެނޭޖިން ޑިރެކްޓަރު މުހައްމަދު ޝަކީލް ވިދާޅުވެއްޖެ އެވެ.

ޝަކީލް މި ގޮތަށް ވިދާޅުވިއިރު، މިދިޔަ ނޮވެމްބަރު 23 އިން ފަށައިގެން ރައީސް ގެންދަވަނީ މާލޭގެ ހުރިހާ އަވަށްތަކުގެ ރައްޔިތުންނާ ބައްދަލުކުރައްވަމުންނެވެ. އެގޮތުން މިހާތަނަށް ވަނީ ވިލިމާލެ އާއި މައްޗަންގޮޅި އަދި މާފަންނުގައި ދިރިއުޅޭ ރައްޔިތުންނާ ބައްދަލު ކުރައްވާފަ އެވެ. މި ބައްދަލުވުންތަކުގެ ބޭނުމަކީ އެކި ކަންކަމުގައި ރައްޔިތުންގެ ހިޔާލާއި މަޝްވަރާ ހޯދެއްވުމެވެ. އަދި ހައްލުކޮށް ދެވެން ހުރި ކަންކަން ހައްލުކޮށް ދެއްވުމެވެ.

އެމްޑީ ޝަކީލް ކުރެއްވި އެކްސް ޕޯސްޓެއްގައި ވިދާޅުވީ ރައީސް ޑރ. މުއިއްޒު ރައްޔިތުންނާ ބައްދަލުކުރައްވަމުން އެ ގެންދަވަނީ ހެޔޮ ނިޔަތުގައި އަދި އެ މަނިކުފާނުގެ ސަރުކާރުގެ ތެރެއިން ރައްޔިތުން އެދޭ ކަންކަން ސީދާ ރައްޔިތުންގެ ކިބައިން ދެނެގަނެ، އެ ހިދުމަތްތައް ރައްޔިތުންނާ ހަމައަށް ފޯރުކޮށްދިނުމުގެ މާތް މަގުސަދުގައި ކަމަށެވެ.

އިދިކޮޅަށް ފާޑުކިޔުއްވަމުން ޝަކީލް ވިދާޅުވީ މި ފަދަ މާތް މަގުސަދެއްގައި ރައީސް ކުރައްވަމުން ގެންދަވާ ކަމަކަށް ހުރަސް އެޅޭ ގޮތަށް އިދިކޮޅު ފަރާތްތަކުން ކުރާ ކަންކަމުން ދޭހަ ވަނީ އިދިކޮޅު ފަރާތްތަކުން ތިބީ މި ގައުމަށާއި ގައުމުގެ ރައްޔިތުންނަށް ހެވެއް އެދިގެނެއް ނޫންކަން ކަމަށެވެ.

"ވީދިފައިވާ އިޖުތިމާއީ ފޭރާން އިއާދަ ކުރުމަށް ރައީސް ޑރ. މުއިއްޒު ކުރައްވަމުން ގެންދަވާ ބުރަ މަސައްކަތުގައި ބަރަކާތް ލައްވާށި، އާމީން،" ޝަކީލްގެ ޕޯސްޓުގައިވެ އެވެ.

ވެރިކަމުގެ ދެ އަހަރު ތެރޭ ‏ރައީސް ޑރ. މުއިއްޒު ‏ވަނީ ރާއްޖޭގައި މީހުން ދިރިއުޅޭ 187 ރަށަށް ވަޑައިގެން އެ ރަށްރަށުގެ ރައްޔިތުންނާ ބައްދަލުކުރައްވާފަ އެވެ. މީގެ ތެރެއިން 63 ރަށަކަށް އެ މަނިކުފާނު ދެ ފަހަރަށް ވަޑައިގަތެވެ.