އެއިޑްސް ނައްތައިލުމަކީ އެންމެން ގުޅިގެން އަދާ ކުރަން ޖެހޭ ޒިންމާއެއް: ރައީސް

އެއިޑްސް ނައްތައިލުމަކީ ވަކި ގައުމަކަށް އެކަނި ކުރެވޭނެ މަސައްކަތެއް ނޫން ކަމަށާއި އެއީ ބައިނަލްއަގުވާމީ މުޖުތަމައު އެކުގައި ގުޅިލާމެހިގެން އަދާކުރަންޖެހޭ ޒިންމާއެއް ކަމަށް ރައީސް ޑރ. މުހައްމަދު މުއިއްޒު  ވިދާޅުވެއްޖެ އެވެ.

ދުނިޔޭގެ އެއިޑްސް ދުވަހުގެ މުނާސަބަތުގައި ރައީސް ކުރެއްވި އެކްސް ޕޯސްޓެއްގައި ވިދާޅުވީ ބައިނަލްއަގުވާމީ މުޖުތަމައު އެކުގައި ގުޅިގެން މަސައްކަތްކޮށްފިނަމަ، 2030 ވަނަ އަހަރު އަންނަންވާއިރަށް ދުނިޔެއިން އެއިޑްސް ނައްތާލެވޭނެ ކަމަށެވެ. އަދި މި ދަތުރަކީ ފަރުދީ ފެންވަރުގައި ފެށެންޖެހޭ ދަތުރެއްގެ ގޮތުގައި އެ މަނިކުފާނު ފާހަގަ ކުރެއްވި  އެވެ.

‏ދުނިޔޭގެ އެއިޑްސް ދުވަހުގެ‏ މި އަހަރުގެ ޝިއާރަކީ ''އޯވަކަމިން ޑިސްޓްރަޕްޝަން، ޓްރާންސްފޯމިން ދަ އެއިޑްސް ރެސްޕޯންސް'' އެވެ.

މި ޝިއާރަށް އަލިއަޅުއްވާލައްވައި އެ މަނިކުފާނު ވަނީ، މަންމައިންގެ ފަރާތުން ތުއްތު ދަރިފުޅަށް އެޗްއައިވީ، ސިފިލިސް އަދި ހެޕިޓައިޓިސް ބީ ވާރުތަވުން ހުއްޓުވައި، "ޓްރިޕްލް އެލިމިނޭޓް'' ވި ދުނިޔޭގެ ފުރަތަމަ ގައުމަކީ ރާއްޖެކަން ފާހަގަ ކުރައްވާފަ އެވެ. މި ކަމަކީ ހުރިހާ ރައްޔިތުންނަށް ހަމަހަމަކާއެކު ސިއްހީ ފަރުވާ ކަށަވަރު ކުރުމަށް ސަރުކާރުން ގެންގުޅޭ ސިޔާސަތުގެ ކާމިޔާބީ ދައްކުވައިދޭ ކަމެއް ކަމުގައި އެ މަނިކުފާނު ވިދާޅުވި އެވެ.

ރާއްޖެއިން ހޯދާފައިވާ މި ފަދަ ކާމިޔާބީ ތަކަކީ ބައިނަލްއަގުވާމީ ފަރާތްތަކާއި އެކު އޮންނަ ބަދަހި ގުޅުންތަކާއި އެއްބައިވަންތަކަމާއެކު އިލްމު ބަދަލު ކުރުމުގެ ތެރެއިން އެންމެން ގުޅިގެން އީޖާދީ ގޮތުން ވެސް ކުރެވުނު މަސައްކަތުން ހާސިލު ކުރެވުނު ކާމިޔާބީތަކެއް ކަމުގައި އެ މަނިކުފާނު ވިދާޅުވި އެވެ.

އެއިޑްސް އާއި ދެކޮޅަށް ކުރާ މަސައްކަތްތައް ހަރުދަނާ ކުރުމާއި މީހުން ހޭލުންތެރި ކުރުމުގެ ގޮތުން، ކޮންމެ އަހަރެއްގެ ޑިސެންބަރު މަހުގެ އެއް ވަނަ ދުވަސް ފާހަގަ ކުރަނީ ދުނިޔޭގެ އެއިޑްސް ދުވަހުގެ ގޮތުގަ އެވެ.