މިނިސްޓަރު ހަލީލް ކުވޭތުގެ ވަގުތީ ބޮޑުވަޒީރުގެ އަރިހަށް އިހުތިރާމުގެ ޒިޔާރަތެއް ކުރައްވައިފި

ފޮރިން މިނިސްޓަރު ޑރ. އަބްދުﷲ ހަލީލް މިހާރު ކުވޭތަށް ކުރައްވަމުން ގެންދަވާ ރަސްމީ ދަތުރުފުޅުގައި އެ ގައުމުގެ ވަގުތީ ބޮޑުވަޒީރު  އަދި އިންޓީރިއާ މިނިސްޓަރު ޝެއިހު ފަހަދު ޔޫސުފު ސައުދު އަލް- ސަބާގެ އަރިހަށް އިހުތިރާމުގެ ޒިޔާރަތެއް ކުރައްވައިފި އެވެ.

ފޮރިން މިނިސްޓްރީން ބުނި ގޮތުގައި މި ޒިޔާރަތުގައި، ރައީސް ޑރ.  މުޙައްމަދު މުއުއްޒުގެ ފަރާތްޕުޅުން ކުވޭތުގެ އަމީރު، ހިޒް ހައިނަސް، ޝެއިހު މެޝަލް އަލް- އަހުމަދު އަލް-ޖަބިރު، އަލް- ސަބަހް އަދި ކުވޭތުގެ ލީޑަރޝިޕަށް ތަހުނިޔާ އާއި ހެޔޮއެދުންތައް އަރިސްކުރައްވާފައިވެ އެވެ.

އަދި ރާއްޖެ އާއި ކުވޭތާ ދެމެދު އިސްލާމްދީނުގެ މަތިވެރި އަސާސްތަކުގެ މައްޗަށް ބިނާވެފައިވާ ދެ ގައުމުގެ ގުޅުން އިތުރަށް ބަދަހި ކުރުމަށާއި ތަފާތު އެކި ދާއިރާ ތަކުން ގުޅުން އިތުރަށް ހަރުދަނާ ކުރުމާ ގުޅޭގޮތުން ވެސް މަޝްވަރާ ކުރެއްވި އެވެ.

މި ބައްދަލުވުމުގައި ރާއްޖޭގެ ތަރައްގީގެ ތަފާތު އެކި މަޝްރޫއު ތަކަށް ކުވޭތު ސަރުކާރުން ފޯރުކޮށްދެމުން އަންނަ އެހީތެރި ކަމަށް ކުވޭތު ލީޑަރޝިޕަށާއި، ކުވޭތު ސަރުކާރުގެ އިސްވެރިންނަށް މިނިސްޓަރު ހަލީލް ޝުކުރު އަދާކުރެއްވި އެވެ.

ހާއްސަގޮތެއްގައި ވެލާނާ އިންޓަނޭޝަނަލް އެއާޕޯޓް ތަރައްގީ ކުރުމުގެ މަޝްރޫއަށް ކުވޭތު ފަންޑް ފޯ އިކޮނޮމިކް ޑިވެލޮޕްމެންޓްގެ އެހީތެރި ކަމާއި، ރާއްޖޭގެ ސިއްހީ ނިޒާމު ހަރުދަނާ ކުރުމަށް ދެމުން އަންނަ އެހީތެރިކަން ހަލީލް ފާހަގަ ކުރެއްވި އެވެ.

މި ބައްދަލުވުމުގައި ކުވޭތުގެ ޑެޕިއުޓީ ބޮޑުވަޒީރު މިނިސްޓާ އަދި މިނިސްޓާ އޮފް ސްޓޭޓް ފޯ ކެބިނެޓް އެފެއާޒް ޝަރީދާ އަބްދުﷲ ސާދު އަލް-މައުޝަރީ، ބޮޑުވަޒީރު އޮފީހުގެ ޗީފް، އަބުދުލް އަޒީޒު ދާހިލް އަލް-ދާހިލް އަދި އެސިސްޓެންޓް ފޮރިން މިނިސްޓަރު ފޯ އޭޝިއަން އެފެއާޒް، ސާމިހު އީސާ ޖައުހަރު ހަޔާތު ބައިވެރިވެވަޑައިގެންނެވި އެވެ.

މި ބޭފުޅުންގެ އިތުރުން ފޮރިން މިނިސްޓަރު ޑރ. ހަލީލުގެ އަރިހުގައި، އެ މިނިސްޓްރީގެ ޖޮއިންޓް ސެކްރެޓަރީ ހަދީޖާ ނަޖީހާއާއި ޕޮލިޓިކަލް ޑިރެކްޓަރު ފާތިމަތު ނަޝާ އިސްމާއީލް ބައިވެރިވެވަޑައިގެންނެވި އެވެ.